- गैरआवासीय नेपाली संघको ११औँ एसिया प्यासिफिक क्षेत्रीय सम्मेलन सन् २०२६ अगस्ट १५ र १६ मा चीनको ग्वान्झाउमा आयोजना हुने भएको छ।
- सम्मेलनले नेपालको आर्थिक समृद्धि, लगानी प्रवर्द्धन र प्रविधि हस्तान्तरणमा प्रवासी नेपालीहरूको भूमिकालाई थप प्रभावकारी बनाउने लक्ष्य लिएको छ।
- यसमा एसिया प्यासिफिक क्षेत्रका साथै विश्वभर रहेका गैरआवासीय नेपाली प्रतिनिधिहरू र समुदायका अगुवाहरूको सहभागिता रहने अपेक्षा गरिएको छ।
- कार्यक्रमले प्रवासी नेपालीबीचको एकता सुदृढ गर्दै उनीहरूले सामना गरिरहेका साझा चुनौती र सम्भावनाबारे गहन छलफल गर्ने मञ्च प्रदान गर्नेछ।
काठमाडौं । गैरआवासीय नेपाली संघ (एनआरएनए) को ११औँ एसिया प्यासिफिक क्षेत्रीय सम्मेलन सन् २०२६ को अगस्ट १५ र १६ तारिखमा चीनको ग्वान्झाउमा आयोजना हुने भएको छ। प्रवासी नेपालीहरूबीचको एकता, सहकार्य र नेपालको समृद्धिमा योगदान पुर्याउने उद्देश्यसहित सम्मेलन आयोजना गर्न लागिएको हो।
आयोजकका अनुसार सम्मेलनमा एसिया प्यासिफिक क्षेत्रसहित विश्वका विभिन्न मुलुकमा रहेका गैरआवासीय नेपालीहरूको उल्लेख्य सहभागिता रहनेछ। विभिन्न देशबाट एनआरएनए प्रतिनिधि (डेलिगेट) तथा प्रवासी नेपाली समुदायका अगुवाहरू सम्मेलनमा सहभागी हुने अपेक्षा गरिएको छ।
सम्मेलनले प्रवासी नेपालीहरूबीच अनुभव, ज्ञान र सीप आदानप्रदान गर्ने अवसर प्रदान गर्नुका साथै उनीहरूले सामना गरिरहेका साझा समस्या, चुनौती र सम्भावनाबारे गहन छलफल गर्ने मञ्चका रूपमा भूमिका निर्वाह गर्ने आयोजकले जनाएको छ।
एनआरएनएका अनुसार सम्मेलन औपचारिक जमघटमा मात्र सीमित नरही नेपालको आर्थिक, सामाजिक तथा विकास प्रक्रियामा प्रवासी नेपालीहरूको योगदानलाई थप प्रभावकारी बनाउने विषयमा केन्द्रित हुनेछ। विशेषगरी लगानी प्रवर्द्धन, प्रविधि हस्तान्तरण, ज्ञान र सीपको उपयोग तथा नेपालसँग प्रवासी नेपालीहरूको सम्बन्धलाई अझ मजबुत बनाउने विषयमा छलफल हुने अपेक्षा गरिएको छ।
सम्मेलनले एसिया प्यासिफिक क्षेत्रमा रहेका नेपाली समुदायबीच सहकार्य विस्तार गर्नुका साथै विश्वभर छरिएर रहेका नेपालीहरूलाई साझा उद्देश्यका लागि एकताबद्ध गर्ने विश्वास गरिएको छ।
आयोजकले एसिया प्यासिफिक क्षेत्रसहित विश्वभर रहेका सम्पूर्ण नेपाली समुदायलाई सम्मेलनमा सक्रिय सहभागिता जनाई यस महत्वपूर्ण अवसरलाई सफल बनाउन आग्रह गरेको छ।
