- पूर्वराजा ज्ञानेन्द्र शाहले बाढी प्रभावितहरूको पुनर्स्थापना, राहत वितरण र क्षतिग्रस्त संरचनाको पुनर्निर्माणलाई तीव्रता दिन सरकारसँग आग्रह गरेका छन्।
- विदेशी सहायता लिँदा राष्ट्रिय स्वाभिमान र स्थानीय परम्पराको सम्मान गर्नुपर्नेमा शाहले विशेष जोड दिएका छन्।
- देशको राजनीतिक अस्थिरता र आर्थिक अवस्थाप्रति चिन्ता व्यक्त गर्दै उनले आत्मनिर्भरता र राष्ट्रिय एकता कायम गर्न आह्वान गरे।
- युवापुस्तालाई देश निर्माणमा जिम्मेवार बन्न र स्वदेशी स्रोतसाधनको उपयोग गरी बाह्य निर्भरता घटाउन उनले सुझाएका छन्।
काठमाडौं । पूर्वराजा ज्ञानेन्द्र शाहले बाढीबाट क्षतिग्रस्त संरचनाको पुनर्निर्माण र प्रभावित परिवारलाई राहत उपलब्ध गराउने कामलाई प्राथमिकता दिन सरकारसँग आग्रह गरेका छन्।
विजयादशमीका अवसरमा जारी सन्देशमा शाहले बाढी प्रभावित नागरिकलाई घरबार र जीविकोपार्जन पुनःस्थापना गर्न समयमै सहयोग उपलब्ध गराउनुपर्ने बताएका छन्।
भोटेकोशी र बूढीगण्डकी क्षेत्रमा आएको बाढी तथा लगातारको वर्षाले पुर्याएको क्षतिलाई उल्लेख गर्दै उनले प्रभावित क्षेत्रमा पुनर्निर्माणका काम छिटो अघि बढाउनुपर्नेमा जोड दिएका छन्। विदेशी सहायता स्वीकार गर्दा राष्ट्रिय स्वाभिमान र स्थानीय परम्पराको सम्मान गर्नुपर्ने उनको भनाइ छ।
शाहले देशको राजनीतिक, संवैधानिक, न्यायिक, आर्थिक तथा प्रशासनिक अवस्थाप्रति पनि चिन्ता व्यक्त गरेका छन्। उनले राजनीतिक स्थिरता कायम गर्न, लोकतान्त्रिक प्रक्रियाको पालना गर्न र अर्थतन्त्र सुधारका लागि काम गर्न राजनीतिक पक्षहरूलाई आग्रह गरेका छन्।
देशलाई आर्थिक रूपमा आत्मनिर्भर बनाउनुपर्नेमा जोड दिँदै उनले बाह्य निर्भरता घटाउन र स्वदेशी स्रोतसाधनको उपयोग बढाउनुपर्ने बताएका छन्। शाहले युवापुस्तालाई देशको भविष्य निर्माणमा जिम्मेवार भूमिका खेल्न पनि आह्वान गरेका छन्।
राजनीतिक अन्योल र आर्थिक कठिनाइका बीच राष्ट्रिय एकता कायम राख्न उनले सबै नेपालीलाई आग्रह गरेका छन्।
