- काठमाडौँबाट खोटाङतर्फ जाँदै गरेको टाटा सुमो सिन्धुलीको फिक्कलमा दुर्घटना हुँदा खोटाङका तीन किशोरीको घटनास्थलमै मृत्यु भएको छ।
- मध्यपहाडी लोकमार्गबाट जिप सुनकोसी नदीमा खस्दा चालकसहित चार जना घाइते भएका छन् भने अन्य तीन यात्रु अझै बेपत्ता छन्।
- दशैं मनाउन घर फर्किरहेका यात्रु सवार उक्त दुर्घटनामा बेपत्ता भएकाहरूको गोताखोर टोलीद्वारा खोजी कार्य जारी रहेको प्रहरीले जनाएको छ।
- रातको समयमा लामो यात्रा र चालकको थकानका कारण दुर्घटना भएको हुनसक्ने प्रारम्भिक अनुमानका साथ प्रहरीले अनुसन्धान गरिरहेको छ।
सिन्धुली । दशैं मनाउन राजधानी काठमाडौँबाट घर फर्किँदै गरेका यात्रु सवार जीप (टाटा सुमो) दुर्घटना हुँदा खोटाङका तीन किशोरीको घटनास्थलमै मृत्यु भएको छ। मध्यपहाडी लोकमार्गअन्तर्गत सिन्धुलीको फिक्कल गाउँपालिका–६ नागथानस्थित सडकबाट जीप करिब दुई सय मिटर तल सुनकोसी नदीमा खस्दा दुर्घटना भएको हो।
जिल्ला प्रहरी कार्यालय सिन्धुलीका अनुसार काठमाडौँबाट खोटाङतर्फ जाँदै गरेको को १ ज २९७६ नम्बरको सुमो आइतबार बिहान करिब २:३० बजे दुर्घटनामा परेको थियो।
दुर्घटनामा परी मृत्यु हुनेमा खोटाङको दिक्तेल रुपाकोट मझुवागढी नगरपालिका–५ लफ्याङकी २१ वर्षीया युपना राई, सोही ठाउँकी १८ वर्षीया काब्या राई र खोटेहाङ गाउँपालिका–६ इन्द्रेणीपोखरीकी १६ वर्षीया स्वस्तिका विश्वकर्मा रहेका छन्। मृतक तीनै जनाको शव परीक्षणका लागि सिन्धुली अस्पताल ल्याइएको छ।
चार घाइते, तीन बेपत्ता
दुर्घटनामा चालकसहित चार जना घाइते भएका छन्। घाइते हुनेमा ओखलढुंगाका चालक २९ वर्षीय आशिष विष्ट, दिक्तेल रुपाकोट मझुवागढी नगरपालिका–३ बाम्राङकी ३८ वर्षीया सम्झना राई, उनकी १२ वर्षीया छोरी सिवानी राई र सोही नगरपालिका–१ का १३ वर्षीय अंकित विश्वकर्मा रहेका छन्। घाइतेहरूको सिन्धुली जिल्ला अस्पतालमा उपचार भइरहेको छ। घाइतेमध्ये सम्झनाको अवस्था गम्भीर रहेको प्रहरीले जनाएको छ।
दुर्घटनापछि जीपमा सवार अन्य तीन जना यात्रु सुनकोसी नदीमा बेपत्ता भएका छन्। नदीमा खसेका यात्रुको खोजीका लागि सशस्त्र प्रहरी बलको विपद् व्यवस्थापन तालिम शिक्षालय (कुरीनटार) बाट गोताखोर टोली र स्थानीय नेपाल प्रहरी परिचालन गरिएको छ। चाडपर्वका वेला यात्रु विवरण (सवारी लगबुक) व्यवस्थित नहुँदा बेपत्ता भएकाहरूको पहिचान खुलाउन समस्या भइरहेको प्रहरीले जनाएको छ।
असिमित यात्रा र थकान कारण हुनसक्ने
दशैंको मुखमा रातको समयमा लामो दूरी तय गर्दा चालकको थकान वा निद्राका कारण दुर्घटना भएको हुनसक्ने प्रारम्भिक अनुमान गरिएको छ। यद्यपि, दुर्घटनाको यकिन कारण भने अनुसन्धानपछि मात्रै थाहा हुने जिल्ला प्रहरी कार्यालय सिन्धुलीका प्रहरी उपरीक्षकले जानकारी दिए।
