- नक्कली भुटानी शरणार्थी प्रकरणमा दोषी ठहरिएका पूर्वउपप्रधानमन्त्री टोपबहादुर रायमाझी आगामी कात्तिक २६ गते कारागारमुक्त हुने भएका छन्।
- ६५ वर्ष पूरा भएका उनलाई ज्येष्ठ नागरिकसम्बन्धी ऐनअनुसार कैदमा २५ प्रतिशत छुट दिने जिल्ला अदालतको आदेशपछि रिहा गर्न लागिएको हो।
- अदालतले रायमाझीलाई ठगी र संगठित अपराधमा चार वर्ष कैद सुनाएको थियो, उनी २०८० वैशाखदेखि डिल्लीबजार कारागारमा रहेका छन्।
- कैद अवधि घटे पनि उनले तोकिएको जरिवानासम्बन्धी दायित्व भने कानुन र अदालती प्रक्रियाबमोजिम पूरा गर्नुपर्नेछ।
काठमाडौँ : नक्कली भुटानी शरणार्थी प्रकरणमा दोषी ठहर भई कैद सजाय भोगिरहेका पूर्वउपप्रधानमन्त्री टोपबहादुर रायमाझी आगामी कात्तिक २६ गते कारागारमुक्त हुने भएका छन्। ६५ वर्ष उमेर पूरा गरेका उनलाई ज्येष्ठ नागरिकसम्बन्धी कानुनी सुविधाअन्तर्गत कैद छुट दिने जिल्ला अदालत काठमाडौँको आदेशअनुसार रिहा गर्न लागिएको हो।
डिल्लीबजार कारागार कार्यालयका जेलर विक्रम पाण्डेका अनुसार रायमाझीलाई कात्तिक २६ गते रिहा गर्न अदालतबाट आएको आदेश सोमबार कारागारमा प्राप्त भएको छ। रायमाझीले ज्येष्ठ नागरिक ऐनअनुसार कैद छुटको माग गर्दै अदालतमा निवेदन दिएका थिए।
गत शुक्रबार न्यायाधीश राजेन्द्र सिंह भण्डारीको इजलासले उक्त निवेदनमाथि सुनुवाइ गर्दै उनलाई ज्येष्ठ नागरिकको सुविधा प्रदान गर्ने निर्णय गरेको हो। ज्येष्ठ नागरिकसम्बन्धी ऐन, २०६३ को दफा १२ मा ६५ वर्ष पूरा भई ७० वर्ष ननाघेका नागरिकलाई कैद सजायमा २५ प्रतिशतसम्म छुट दिन सकिने कानुनी व्यवस्था छ।
यसअघि गत असार ३० गते जिल्ला अदालत काठमाडौँले नक्कली भुटानी शरणार्थी प्रकरणअन्तर्गत ठगी, संगठित अपराध र राज्यविरुद्धको कसुरमा रायमाझीलाई दोषी ठहर गर्दै अधिकतम चार वर्ष कैद र ४० हजार रुपैयाँ जरिवानाको फैसला सुनाएको थियो। उनी २०८० वैशाख ३१ गतेदेखि निरन्तर थुनामा रहँदै आएका छन्।
अदालतको पछिल्लो आदेशसँगै उनको कैद अवधि घटे पनि तोकिएको जरिवानासम्बन्धी दायित्व भने कानुन र अदालती प्रक्रियाबमोजिम यथावत् रहने जनाइएको छ।
