- विश्व हिन्दू परिषद् नेपालले चलचित्र ‘पाँच पाण्डव’ मा महाभारतका पात्रहरूको प्रस्तुतिप्रति आपत्ति जनाउँदै चलचित्र विकास बोर्डमा ध्यानाकर्षणपत्र बुझाएको छ।
- चलचित्रका गीत, दृश्य र संवादले हिन्दू धर्मावलम्बीको धार्मिक भावना र सांस्कृतिक गरिमामा चोट पुर्याउन सक्ने परिषद्को ठहर छ।
- बोर्डलाई विवादित सामग्री छानबिन गर्न, आपत्तिजनक दृश्य हटाउन र आवश्यक सुधार नभए प्रदर्शनमा रोक लगाउन परिषद्ले माग गरेको छ।
- माग पूरा नभए देशव्यापी विरोध, चलचित्र बहिष्कार र कानुनी उपचार खोज्ने चेतावनी परिषद्ले दिएको छ।
काठमाडौं। नेपाली चलचित्र ‘पाँच पाण्डव’ मा महाभारतका पात्रहरूको प्रस्तुतिलाई लिएर विश्व हिन्दू परिषद् नेपालले आपत्ति जनाएको छ। चलचित्रका सार्वजनिक गीत, दृश्य र संवादले हिन्दू धर्मावलम्बीको धार्मिक भावनामा चोट पुर्याउन सक्ने भन्दै परिषद्ले चलचित्र विकास बोर्डसँग छानबिन गरी आवश्यक सुधार गर्न माग गरेको छ।
परिषद्ले यस विषयमा चलचित्र विकास बोर्डलाई औपचारिक ध्यानाकर्षणपत्र बुझाउँदै चलचित्रका प्रचार सामग्री र सार्वजनिक भएका दृश्य तथा गीतको अध्ययन गर्न आग्रह गरेको हो।
महाभारत हिन्दू धर्म, संस्कृति र दर्शनसँग जोडिएको महत्वपूर्ण ग्रन्थ भएको उल्लेख गर्दै परिषद्ले भगवान् श्रीकृष्ण, पाँच पाण्डव र द्रौपदीजस्ता पात्रहरू करोडौँ हिन्दू धर्मावलम्बीको आस्था र श्रद्धासँग जोडिएको जनाएको छ। चलचित्रमा यी पात्रहरूलाई प्रस्तुत गरिएको शैलीले उनीहरूको धार्मिक तथा सांस्कृतिक गरिमामा आँच पुर्याउन सक्ने परिषद्को भनाइ छ।
परिषद्ले चलचित्र निर्माण र अभिव्यक्तिको स्वतन्त्रताको सम्मान गर्नुपर्ने भए पनि त्यसका नाममा धार्मिक आस्था र सांस्कृतिक मर्यादालाई बेवास्ता गर्न नहुने जनाएको छ। धार्मिक तथा ऐतिहासिक पात्रहरूलाई चलचित्रमा प्रस्तुत गर्दा मनोरञ्जन र व्यावसायिक पक्षसँगै सम्बन्धित समुदायको आस्थालाई पनि ध्यान दिनुपर्ने उसको धारणा छ।
परिषद्ले बोर्डसमक्ष छवटा माग राखेको छ। सार्वजनिक भएका गीत, दृश्य, संवाद र प्रचार सामग्रीको तत्काल छानबिन गर्न तथा प्रदर्शनअघि चलचित्रको सम्पूर्ण विषयवस्तुको समीक्षा गर्न उसले आग्रह गरेको छ। धार्मिक आस्था, सांस्कृतिक मर्यादा र सामाजिक सद्भावमा असर पार्न सक्ने सामग्री पहिचान गरी आवश्यक कदम चाल्नुपर्ने परिषद्को माग छ।
त्यस्तै, आपत्तिजनक ठहरिएका दृश्य र संवाद हटाउन वा संशोधन गर्न निर्माण पक्षलाई निर्देशन दिन, निर्माता तथा निर्देशकसँग स्पष्टीकरण माग गर्न र आवश्यक सुधार नगरी चलचित्र प्रदर्शन गर्न खोजिएमा प्रचलित कानुनअनुसार निर्णय लिन परिषद्ले बोर्डको ध्यानाकर्षण गराएको छ। भविष्यमा धार्मिक ग्रन्थ, देवीदेवता तथा ऐतिहासिक र सांस्कृतिक पात्रहरूलाई चलचित्रमा प्रस्तुत गर्दा सम्बन्धित समुदायको आस्थाको सम्मान सुनिश्चित गर्न पनि उसले माग गरेको छ।
आफ्ना माग सम्बोधन नभए देशव्यापी रूपमा शान्तिपूर्ण विरोध र चलचित्र बहिष्कार अभियान सञ्चालन गर्ने परिषद्ले चेतावनी दिएको छ। आवश्यक परे कानुनी तथा संवैधानिक उपायसमेत अपनाउने उसले जनाएको छ।
परिषद्ले यस विषयमा निष्पक्ष छानबिन गरी आवश्यक निर्णय लिन र त्यसबारेको जानकारी लिखित रूपमा उपलब्ध गराउन बोर्डसँग आग्रह गरेको छ। धार्मिक सहिष्णुता र सामाजिक सद्भाव कायम राख्न चलचित्र निर्माणमा सिर्जनात्मक स्वतन्त्रतासँगै सामाजिक उत्तरदायित्व र सांस्कृतिक संवेदनशीलतालाई पनि उत्तिकै महत्व दिनुपर्ने परिषद्को भनाइ छ।
